jueves, 27 de julio de 2017

Oh la vie, oh la vache

Aralarko zulo batean (ez Indian, Aralarren), 5 metroko sakoneran harrapatuta egunak zeramatzan behi bat salbatzeko, ahaleginak eta bi egin dituzte suhiltzaile batzuek uztail honetan, gure herriko jaixetan (ez besteren herrian, gurean) giza primate saldo baten dibertigarri dozenaka behi eta zezen torturatu eta akabatu dituzten aldi berean.

La vaca Ojitos y su valor económico

domingo, 2 de julio de 2017

Etena ezin eraman

Problema ez da presa: problema ezin etena da, eta, areago, etena ezin eramana.

sábado, 1 de julio de 2017

izaten da
ezezagunari begietara begiratzea
beti irribarre ez egitea
semeari beroki arrosa jartzen uztea
"no te entiendo" esaten dizunari
"nik zuri bai" erantzutea
aspaldi bukatua dena bukatzea
ahitzeraino barne-husten utzi ordez

izaten da
eguzki-plaka bat teilatuan
andre tripontzi bat plaian
frontoixka bat eskabadoren artean

nahiz eta
inor ez zen berez jaio
erresistentzia izateko

martes, 20 de junio de 2017

terapia

lagunek alde egiten zioten hura
joan zen terapiara
eta esan zioten amaren maitasun falta zela sorburua
edo amak titia eman ez izana
edo gurasoek gehiegi babestu izana
edo bereziegia izatea mundu arlote honen arrunkerietarako

"bakana zara", esan zioten
eta gomendatu zioten ezagutzeko gehiago bere burua
gutxiago esateko "ni" baina
autoelikatzeko beti
maitatzeko bere azal-mamiak
kritikari barkabera izateko bere buruarekin

orduko mila duro baino dezentez gehiago
kobratzen zuten aditu haiek
esan zioten autonomoa izateko
autonom...
auto...
bakarrik egon zedila, alegia.
eta etortzeko lasai kontsultara
behar zuen guztietan.

jueves, 8 de junio de 2017

Ekarpen ustez sarigarri hori

Ez da eskuzabaltasuna, ez da debozioa, lagunok: norberaren ume bat edukitzen denean (odol, gene edo/eta gainerako bereizgarri familiar-kulturalak barne), ume hori norbera(rena) da. Jabetza tartean badago, genitiboak nahitaez dakar asimilazio bat, eta terminologiak ere bai: jabetza, jabe(tz)a. Ume hori -tz hori bezain burujabea da; -rena hori bezain burujabea. "Zu zeinena zara?", galdetzen dute oraindik herri batzuetan adin batetik gorako andreek, nor zaren jakin nahi dutenean. Nor, hau da, norena. Eta norbera(rena)gatik lo-orduak, eta dirua, eta denbora, eta izerdiak ematea, jaun-andreok, ez da sekula izan ez eskuzabaltasuna, ez debozioa, ez eta, definizioz behintzat, gizarteari eginiko ekarpen zoragarri eta sarigarri bat.

sábado, 20 de mayo de 2017

Erraza da

Irriak zenbat eta gezurrezkoagoak, orduan eta bareagoak gauak.
Erraza da. Merkea dirudi.

sábado, 1 de abril de 2017

Lagunari

Amesgaiztoaren barruan
ez da ahotsik, laguna.
Hitz oro da gauarentzako
janzki nasaiegi bat.
Ez da ezkatarik
baina dena da ur
argizarizko
ur lodi itogarri,
ezustearen gordinak
sarraskitzen duenean eguneroko
ogiaren samurra.

Hemen izanik ere
hara gara, laguna.
Mututurik baina
hemen zain
zain, adi
zaindu nahian
gure habian zain duzuen
habia xume goxoa.